Краязнаўчая павучалка «Шукаем падказкі ў беларускіх казках»

15 кастрычніка, да 75-годдзя з дня нараджэння Аляксея Мікалаевіча Якімовіча, у філіяле «Дзіцячая раённая бібліятэка» прайшла краязнаўчая павучалка «Шукаем падказкі ў беларускіх казках», на якую былі запрошаны вучні 3 «А» класа ДУА «Сярэдняя школа № 5 г. Слоніма». Дзяцей пазнаёмілі з жыццёвым і творчым шляхам Аляксея Мікалаевіча – беларускага дзіцячага пісьменніка, педагога, драматурга, нашага земляка. Чыталі розныя творы юбіляра: вершы, казкі, апавяданні. Адно з якіх – апавяданне «Па дарозе са школы», якое пісьменнік напісаў, вучыўшыся ў 8 класе. Яно было ўпершыню надрукавана ў газеце «Піянер Беларусі», а потым уключана ў кнігу «Напісалі кніжку самі». Рабяты азнаёміліся з літаратурай, прадстаўленай на выставе. На памяць аб краязнаўчай павучалцы кожны з вучняў атрымаў закладку па творах юбіляра. З нагоды юбілею удзельнікі аматарскага аб’яднання лялечнага тэатра «Сонейка» падрыхтавалі і паказалі спектакль «Хто вінаваты?» па казцы аўтара. З вялікім задавальненнем дзеці паглядзелі казку і шмат у каго з’явілася жаданне ўдзельнічаць у лялечным тэатры, які дзейнічае пры бібліятэцы. Мерапрыемства прайшло цікава і весела.